1 қыркүйек – Білім күніне арналған салтанатты шаралар аудандағы барлық мектептерде сән-салтанатымен өтті. Биылғы жаңа оқу жылының қасиетті Құрбан айт мерекесімен тұспа-тұс келуінің өзі көңілге қуаныш ұялатады. Осындай айрықша мәні бар жиын Жетіген ауылдық округі Құйған ауылындағы №32 орта мектебінде де ұйымдастырылды.

Салтанатты жиында мектеп директоры Д. Көшекбаева сөз сөйлеп, оқушыларды алғашқы оқу күнімен құттықтап, «Білім беру саласында ауданымызда үлкен іргелі өзгерістер, жақсы нәтижелер бар. Биыл 1–7 сынып аралығында жаңартылған бағдарлама арқылы оқитын болады. Сіздерге жаңа оқу жылында жаңа ізденістер мен білімнің биік шыңын бағындыруды тілеймін» – дей келе, ұстаз бен шәкірт үшін ерекше күн – Білім күні мерекесімен жиналған жұртшылықты құттықтап, жаңа оқу жылы табысты, жеңісті болсын деген ізгі ниетін білдірді.

Сонымен қатар, жиналған қауымды ардагер ұстаз Р.Рысалықызы құттықтап, жаңа жетістіктер мен ашылуларға ұдайы ізденіс, шығармашылық, мықты денсаулық және жаңа бастамаларда тек қана сәттілік тіледі.

Салтанатты шарада 1 сыныпқа келген оқушыларға жоғарғы сынып оқушылары қалам, дәптер және оқуға қажетті құрал-саймандар сыйлады.  Білім алушылар ұстаздар қауымына, алтын ұя мектептеріне арналған әсем әндерді әуелете шырқады.

Салтанатты шарадан кейін ата-аналар 1 және 11-сынып оқушыларының сыныптарын аралап, оқушылармен емен-жарқын әңгімелесіп, сапалы білім мен саналы тәрбиені қатар ұштастыра берулеріне тілек білдірді.

Айта кетейік, №32 орта мектепке жаңа оқу жылында 225 шәкірт мектеп табалдырығын аттады. Оның он төрті 1 сынып оқушылары.