Қазан айындағы шуақты күрең күздің берекелі күнінде Байсерке ауылдық округіндегі ақсақалдар кеңесінің төрағасы, қоғам қайраткері, ауданымыздың «Құрметті азаматы» Құрманғали Кенжеқұловтың ұйымдастыруымен Байсерке ауылдық округіндегі «Бәйге төбеде» Елбасының «Болашаққа бағдар: рухани жаңғыру» бағдарламалық мақаласында айтылған ұлттық құндылықтарды насихаттау бағытында ұлттық спортымыз көкпар тартылды. Көкпарға Байсерке ауылынан сайдың тасындай 30-ға жуық көкпаршы жігіттер қатысты.

Округте өткен шараға аудан тұрғындары ғана емес, көршілес аудандардан арнайы барғандар да куә болды. Құрманғали ағамыз ұйымдастыру жайлы былай деген еді:

– «Ұлттық кодымыз Ұлттық спорт десе делебесі қозып тұратын қазақ жігітерінің бойында. Ол – көкпар. Көкпар нағыз исі қазақтың төл ойыны. Бұл ойынның бәсекелік сипаты арқылы ауыл азаматтарының күші мен ептілігін арттырып, батылдық пен ерлік қасиеттерін дамыту» – дегенді алға тартты.

Жиналғандар жарысты соңына дейін тамашалап, көрермендерге арнайы тігілген шатырдың асында тамаша демалыс күнін өткізді. Ұлттық спорт ұлықталған шараға Байсерке ауылдық округі әкімінің орынбасары Асхат Бариев қатысып: «Байсеркеде бұрын-соңды мұндай ауқымды көкпар ойыны өтпеген. Бастамамызды округ әкімі қолдаса келесі жылы да осы уақытта жарысты өткіземіз деп ойлаймын. Ұлттық спортты ұлықтауға арналған шаралар алдағы уақытта да жалғасады», – деді.

«Көкпар» сайысының қорытындысы бойынша жүлделі орын иелері ақшалай сыйлықтармен марапатталды. Ауыл жігіттері де ұйымдастырушыларға шынайы алғысын білдірді.