Аудан көркі мен оның тазалығына шын мәнінде жаны ашитын адамдар үшін әр айда жүргізілетін сенбілік нағыз еңбек майданына айналды. Сенбілік кезінде аула іштері мен бас көше бойлары және кіші көше қиылыстарына аса көңіл бөлініп тазаланса, бірқатар аумақтарда отырызылған жас шыбықтар суарылды. Аудан орталығында аймағымыздың санитарлық тазалығы мен көгалдандыру жұмыстарына арналған тазалық акциясы аясындағы жалпыхалықтық сенібілік ұйымдастырылып отырады.

Бұл күні аудандағы түрлі мекеме қызметкерлері, қоғамдық ұйымдар мен ауыл халқы да қолдарына күрек, тырма, сыпырғыш алып, тазалық жұмыстарына белсене кірісіп, «Көп түкірсе көл» демекші, әр мекеме қызметкерлері өздеріне тиесілі жер телімдерін тазалап тұрады.

Бір қуантатыны, Іле ауданы тұрғындары ауылдың гүлденуіне бей-жай қарамайтындығын әр сенбілік сайын сөзбен емес, іспен дәлелдеп келеді. Денсаулық кепілі – таза ауа мен жасыл желек екендігін мойындаған олардың белсенділігі әр сенбілік сайын артқандай. Дегенмен, аймағымыздың мұнтаздай тазалығына әлі де көп еңбек ету керек. Сондықтан, алдағы уақытта сенбіліктер өз жалғасын таппақ.

Ауданда тазалық жұмыстарын жүргізіп, оны көркейту мақсатында арнайы жоспар жасақталып, аудан көлемінде екі айлық сенбілік жарияланған болатын. Өткен сенбіліктерде де, осы аптада да мекеме ұжымдары мен аудан тұрғындары тазалық жұмыстарын ойдағыдай атқарып, қызу еңбек етті. Ұжым болып атсалыса отырып, қолдарына күрек, сыпырғыларды ұстап, сенбілікке бір адамдай атсалысып, тазалыққа өз үлестерін қосты. Осы аптада өткізілген сенбілік барысына 2702 адам қатысып, 50 жуық гектар жер тазаланды. Аудан аумағында қарағай, туя көшеттері отырғызылып арнайы техникамен суарылып тұрады. Жиналған қоқыс қалдықтарын шығару үшін арнайы 38 техника жұмылдырылды. Шығарылып тасталған қоқыстар 262 тоннаны құрады.

Ауыл-ауылға жеткізілген көшеттерді отырғызу жұмыстарын сол елді мекендердегі жастар, жергілікті қауымдастық мүшелері, ауыл тұрғындары ұйымдастырды. Соның нәтижесінде әр ауылда көгалдандыру, әрбір көше мен ауланы жасыл желекке бөлеу жұмысы қарқын алды. «Атадан мал қалғанша, тал қалсын» деген ата-бабамыздың өсиетін берік ұстанып, ұйымшылдықтарымен, белсенділіктерімен көзге түсуде.

Ауылдарымыздың көркеюі әр аулаға байланысты екені белгілі.

Ауланы абаттандыру - ауылдың абыройы. Сол себептен, алдағы уақытта өз жалғасын табатын игілікті істен шеткері қалмай, оған бір кісідей атсалысайық, ауылымыздың абыройы арта түсетіні анық. "Ауылын көріп, азаматын танығандай" беделіміз биік болсын, ағайын!

К. КАРИБАЕВ,

Іле аудандық мемлекеттік экология инспекторы